政情：張國鈞繼承樹根做「金句王」
民建聯（民記）現任立法會議員鍾樹根喺新一屆立法會選舉中，成功幫黨友張國鈞「抬轎」，成功將佢送入議會。樹根過去喺議事廳發言期間，經常創作嘅鍾式金句，例如「子烏虛有」、「明張目膽」同「雞毛鴨蒜」等，為議事廳帶嚟唔少「歡樂」。正當大家擔心未來議會冇咗樹根，會少咗啲娛樂性之際，張國鈞就「發功」，將成語「劍拔弩張」錯講為「劍弩拔張」，未入議會就已經「樹根化」。
誤講「劍弩拔張」都唔知
張國鈞同幾個立法會新丁尋日出席一個論壇，台下有民記成員發言時指民主黨候任立法會議員鄺俊宇「呃選票」，期間一度被噓。張國鈞事後發言嘗試「打圓場」，指選舉時各方陣營「劍弩拔張」，有時喺說話上可能會激怒對方，希望大家未來可以合作。明明係「劍拔弩張」，張國鈞竟然講錯係「劍弩拔張」，講完仲唔發覺自己講錯喎。
睇嚟張國鈞唔單止繼承咗樹根嘅議席，亦盡得樹根「金句王」嘅真傳。雖然議會內少咗樹根，但依家又多番個張國鈞，相信未來立法會繼續有得「Fun」。