政情：唔睇天氣報告高永文冇搽防曬中招
港男多數唔重視皮膚美白，食物及衞生局局長高永文尋日出席宣傳皮膚健康活動時，提到平日收到唔同團體邀請佢做主禮嘉賓，多數都係要同陽光玩遊戲，例如扒龍舟、足球比賽等，所以佢事前都會做足防曬工夫，準備防曬三寶，即係太陽帽、太陽眼鏡同防曬產品。
學精咗隨車攜帶
不過，佢講起上周日去迪士尼主持開跑儀式，以為實會落雨，無搽太陽油就出門口，點知老貓燒鬚去到先知天氣好好，臨急喺現場搵人借防曬產品。俗語話天有不測之風雲，其實出門口前最好要睇天氣報告，唔通佢冇呢個習慣？依家佢學精咗，擺定一、兩支防曬產品喺車度，以備不時之需，仲可以借畀人用添！
佢尋日都有示範點搽防曬產品，提醒男士們都要做足防曬，但可能一時緊張，擠壓太多防曬產品出嚟，變咗好似搽護手霜咁。