政情：撈亂超區直選乳鴿「宇」無倫次
距離新一屆立法會開鑼唔夠一個月，主席之爭暫時係做過內會主席嘅工業界梁君彥同埋九龍東直選嘅獨立議員謝偉俊嘅爭奪戰。至於非建制派方面，透過俗稱「超區」嘅區議會（第二）功能界別勝出嘅民主黨（白鴿黨）涂謹申（阿涂）曾經講過，話如果非建制派無人出戰，佢不排除會上陣，而超區票王、「乳鴿」鄺俊宇（Roy）尋日出席論壇時被問到主席嘅心水之選時，講明拒絕功能界別嘅人，但又推薦阿涂喎。「超區」都係功能界別，唔通阿Roy撈亂咗「超區」同直選？抑或佢唔撐阿涂呀？
喺尋日一個論壇討論新一屆立法會主席人選，阿Roy話：「假如嗰個（人）係功能組別、甚至係自動當選嘅話呢，佢點能夠勝任做立法會主席呢」。跟住佢又講明自己係支持由直選產生、同埋支持民主政制嘅候選人。同場有參選新界東直選落敗嘅自由黨李梓敬，喺佢談論其心水之選時，阿Roy又爆咗句「我向你推薦涂謹申」。
議會新丁唔熟書「露晒底」
究竟阿Roy知唔知自己講緊乜？雖則「超區」係有逾三百萬名合資格選民可以投票，但都係選出五個議席嘅功能界別，而佢同阿涂都係喺「超區」勝出，都係屬於功能界別嘅議員，既然拒絕功能界別嘅人做主席，但又推薦阿涂，睇嚟佢係將超區同直選撈亂咗喇！
另一方面，青年新政之前喺記者會上，曾建議阿Roy同直選票王朱凱廸出任立法會主席，話主席需要有代表性，而兩人亦都有足夠嘅民意授權基礎。但《基本法》規定立法會主席必須年滿四十歲，阿Roy同朱凱廸都「未夠秤」，根本唔符合資格。話雖如此，但阿Roy尋日仍然公開多謝青年新政嘅「厚愛」，仲形容呢個建議「非常可愛」喎。與其話「可愛」，不如話係「可笑」喇！
班議會新丁一出閘就「露晒底」，完全唔熟書。趁仲有唔夠一個月嘅時間，佢哋就應該惡補下啲議事規則，否則復會後分分鐘又「獻醜」呀！