中環出更：羅冠聰反口唔去十‧一酒會
年紀輕就可以講嘢唔算數？港府早前向包括本土自決派在內嘅全體候任立法會議員發出請柬，邀請佢哋出席十‧一酒會，當時民主黨七名議員同香港眾志羅冠聰都表明會出席表達意見，令羅冠聰有機會成為首位現身十‧一酒會嘅本土派人士，意義重大。
事隔幾日，以二十三歲之齡成為歷來最年輕議員嘅羅冠聰，前日突然喺社交網站反口宣布唔會赴會，未知係咪同另一本土派政團青年新政日前發表聲明，呼籲所有非建制議員杯葛酒會，構成政治壓力有關。
本土派非首次變臉
其實今次已經唔係本土派喺當選後首次反口，之前特首梁振英邀請各黨派候任議員會面，包括朱凱廸等多名本土派起初亦話願意出席，但其後又紛紛轉軚杯葛，同政府對橫洲發展計劃嘅立場都係一時一樣，前言不對後語。
另外，朱凱廸尋日出席一個論壇節目時亦表明，唔會出席十‧一酒會，話討厭呢類活動，又質疑點解十‧一值得慶祝。
卓妮