中環出更：鐵騎環島籌款助幼學
電單車環島遊就聽得多，但喺香港以呢種形式籌款就可以話係第一次，尋日保良局就同一個知名電單車品牌合作籌款，組織電單車隊環繞港島遊籌款。保良局主席郭羅桂珍話，希望為活動除咗籌款外仲可以宣傳健康、手足情誼同守望相助等正面訊息。
六十架鐵騎由保良局銅鑼灣總部出發，途經港島南區再折往西區新海旁，由港島西至港島東，以赤柱廣場為終點，沿途吸引唔少市民圍觀同歡呼，籌得嘅款項將用作兒童語言訓練等慈善工作。
名人難忘刺激體驗
點解會諗到今次呢個咁新鮮嘅籌款形式，郭羅桂珍話係因為過往同香港欖球總會有合作舉辦唔同嘅慈善項目，而今年對方介紹咗呢個電單車品牌畀佢哋認識，所以就促成咗今次活動，嚟緊佢哋仲會喺慈善舞會兼拍賣一部特別版FORTY-EIGHT電單車。佢仲話以前都坐過電單車，係老公即莎莎主席郭少明揸嘅，仲記得坐電單車時感覺好爽快，印象深刻，而總理陳黎惠蓮年輕時亦有坐過，雖然有少少驚，但都係刺激嘅。
同場仲有總理顧東華同佢大仔Dreyfus，原來佢哋兩父子都好鍾意電單車，顧東華仲大讚至愛經典款式chopper，不過佢兩個都冇機會學。點解呢？事關顧東華話當年佢媽媽唔畀佢學，驚佢危險，而佢個仔就同佢情況一樣，所以兩個都係得個睇字！咁有冇儲吓啲同電單車有關的書或模型？顧東華話自己冇，但喺外國嘅細仔可能有，仲話細仔同佢哋兩個一樣愛車，但喺外國就做乜嘢都唔知，笑言分分鐘考埋牌佢都唔知喎！
卓妮