正所謂，橋唔怕舊，最緊要受。咪以為電話騙案被傳媒報道過N次就過晒氣，其實一直有受害人上當。呢，淨係呢兩日咋，先後有兩名市民受騙，涉款超過三百萬元，都咪話唔誇張。
嗱，兩單電騙案受害人咁啱都係女性，騙徒手法亦如出一轍，自稱係入境處人員，電話接駁到內地執法機關後，聲稱受害人涉及內地騙案，必須依指示將錢轉入內地戶口，結果財到光棍手，一去冇回頭。最令人難以置信嘅係，受害人一個係公司董事，一個係大學教授，連飽讀詩書嘅有識之士都上當，證明呢類騙案真係防不勝防。
當然啦，蒼蠅唔叮無縫嘅蛋，受害人自己唔提高警惕咯喎，就算警方及傳媒如何高調提醒，都係嘥氣嘅啫。大家有眼見，電騙案經過中港警方去年合力打擊，傳媒不厭其煩報道，數字已經自高峰期大大回落，但至今依然有人受騙，金額仲要唔細，除咗怪騙子無良，都要怪自己點解咁容易落疊。點都好喇，野火燒不盡，春風吹又生，警方必須繼續打擊，唔好掉以輕心，否則只會有更多人受害嘅咋。
話時話，電騙案雖然源自台灣，但就被內地「發揚光大」，好似福建安溪同埋廣東電白咁吖，已經係遠近馳名嘅騙子之鄉，電騙集團甚至成為當地產業，有啲更係整條村、整個家族都以騙人為業，不但唔覺得羞恥，仲以此為榮添，真係無恥者無敵。最悲哀嘅係，以前都仲有樣嘢叫盜亦有道，家陣嘅騙子就無底線，好似最近內地接連有窮苦大學生被騙去學費，搞到有人活活激死，有人投湖自盡，簡直係人間悲劇。咁你話嘞，電騙集團係咪害人不淺吖？係咪應該趕盡殺絕吖？
可惜吖，內地打擊呢類騙案往往只係一陣風，好似去年係就係聯同香港警方直搗印尼電騙大本營，拘捕台灣及內地首腦及團夥，係威係勢咁款，點知風頭過後就無以為繼，搞到電騙案好快就死灰復燃。大家都知，呢類案件涉及跨境犯罪，單靠一地警方之力根本難以掃除，必須多地聯手，如果內地執法部門放軟手腳，真係好難搞得掂o架。
講起就唏噓，中國山青水秀，偏偏盛產騙子，官場有官場嘅騙，民間有民間嘅騙，成個社會乜都唔缺，淨係缺德無恥。咁仲唔止，內地不法分子近年大舉湧入香港犯案，好似貴州幫就專攻豪宅爆竊同埋豪門綁架，斬樹黨就專向郊區沉香樹落手，你話唔影響中港關係就假咯。古人話，禮義廉恥，國之四維，四維不張，國乃滅亡，再咁落去，遲早一語成讖都似！