人貴自知，知道自己的不足，就不會錯了N次依然犯上同一錯誤。梁振英在立法會答問大會上，便常抓住議員的小錯處而洋洋自得。記得張超雄曾在特首答問大會上指梁振英因僭建及收受澳洲企業UGL五千萬元事件而出現誠信問題，張一時講錯成UGC，雖然佢下一句已即時更正番，但ＣＹ好似執到寶咁，藉此大講廢話，話張超雄連間公司名都講錯，說明佢對呢件事嘅認識有限。事後不少論者指ＣＹ冇風度，人哋一時噏錯名，唔等於對件事冇認識，好似老朽周不時在櫃員機前突然「斷片」，諗極都記唔起提款卡密碼，唔通老朽存喺銀行嘅錢就因此而唔係自己嘅？
今次立法會選舉，反對梁振英連任的非建制派候選人在直選中取得近一百二十九萬票。當被問到是否反映對其施政不滿，ＣＹ說：「有啲好明顯反對我連任嘅議員都冇當選。」又係顧左右而言他。家陣不少更激進勇武嘅候選人當選，未來議會恐怕唔止掟蕉飛杯咁簡單，何必咁快喜形於色？
古人說：善難者，務釋事本。不善難者，捨本而理末。捨本而理末，則辭構矣。意思是，善於辯駁的人，致力於抓住根本而捨去末節。不善於辯駁的人，則捨去根本而注意末節。捨去根本而去注意末節，就構成了言詞繁冗、廢話連篇的情形。ＣＹ最愛捨本而理末，答非所問，加上記恨記仇，比「語言偽術」更不堪！
做特首理應有容人之大度，否則士之所以不至，難以用人唯能，看其班子，至叻膽自大，難怪管治一塌糊塗。《世說新語》記王黃門兄弟三人俱詣謝公，子猷、子重多說俗事，子敬寒溫而已。既出，坐客問謝公：向三賢孰愈？謝公曰：小者最勝。客曰：何以知之？謝公曰：吉人之辭寡，躁人之辭多，推此知之。亂噏廢話顯然非管治人才，未來選特首，相信沉着做實事者才是北大人嗰杯茶。