政情：陳沛然當選 醫生變副業
立法會有不少「大懶蟲」，其中放棄連任嘅醫學界議員梁家騮就喺主要會議嘅出席率都「包尾」。當選新一屆醫學界議員陳沛然（Pierre）就話，當選後會主力做好議員工作，所以會將現時醫生工作轉為「兼職」，唔希望出席率會「太樣衰」，承諾絕對唔會做出席率「包尾」嘅議員喎！
本身為律敦治醫院腸胃肝臟科專科醫生及內科副顧問醫生嘅Pierre話，公立醫院對於醫生成為議員後嘅工作安排會有相關制度，相信可以協調好。而佢暫時只會加入食物安全及環境衞生事務委員會、衞生事務委員會及福利事務委員會。
雖然Pierre已表明不欲加入政黨，但係公共專業聯盟嘅會計界議員梁繼昌（Kenneth）已向自稱係「淺黃」嘅Pierre「招手」。不過，Kenneth就唔係邀請Pierre加入公專聯，而係想搵佢做辦公室鄰居，莫非想「近水樓台先得月」﹖