政情：樂富議辦寬頻都冇 譚文豪有排執
立法會議員梁家傑完成今屆任期之後就會退下火線，成功接棒嘅飛機師譚文豪估唔到一當選就要處理梁家傑留低嘅爛攤子！譚文豪話，佢已經接手咗梁家傑位於樂富及藍田嘅地區辦事處，但啲辦事處甩甩漏漏，又冇得上網，電腦又殘舊，要執正佢都要花啲時間。
譚文豪話，樂富地區辦事處最大問題就係無得接駁光纖寬頻，令到職員上網好大問題，佢一到埗就已經幫班職員買咗WiFi蛋，即係流動數據上網，但始終都要搵一個長遠嘅解決方法。佢又話，會趁新上任有一筆營運辦事處開支撥款，換走一批古董電腦，等同事唔好因為電腦太慢影響工作效率。
雖然殘殘舊舊，但譚文豪話點都唔會放棄樂富辦事處，因為個辦事處係由泛民元老司徒華相傳下來，都代表住幾代嘅泛民主派。佢又話，覺得兩個地區辦事處都唔係好夠，想開多一個加強地區服務，但開辦事處嘅成本好高，希望可以獲分配房屋署嘅舖位，否則成事機會都幾微。