中環出更：事業才藝並重 女企業家畫出姿采
時下女性已經唔止入得廚房出得廳堂咁簡單，好似金紫荊女企業家協會（協會）一班成員，除咗做生意叻之外，藝術文化修養亦同樣出眾。尋日協會就邀請到嶺南畫派大師趙少昂入室弟子兼嶺南派第三代傳人伍月柳即場獻技，卓妮見伍大師揮筆示範繪畫一幅「脫衣換錦」，佢話係寓意一班商界叻女放下職場身份及工作後，又有另一番姿采。
協會主席彭芷君認為，要成為傑出女企業家，除咗工作表現出色，文化涵養同樣重要，因此希望一眾成員可以為傳承藝術文化出一分力。佢早前有幸與伍月柳等約十位國畫大師一同即興創作，於是就約定對方出席今次「麗智人生」系列午餐演講會。難得請到伍大師獻技，吸引協會成員踴躍出席，包括常務副主席丘璟珊、林淑怡、副主席李凱琪、鄺紫凌、鄭美恩、執委蔡淑娣及會員李心平等。
陳莉敏化妝品變藝術
出席活動嘅仲有著名設計師蔡毅明、美容達人陳莉敏。原來陳莉敏都跟過趙少昂徒弟學過兩年繪畫，一向主意多多嘅佢仲諗到用過期及無用嘅化妝品嚟創作。佢話，通常女仔都好鍾意買化妝品，但往往用唔到咁多，擺吓擺吓最後就變成浪費，佢於是靈機一觸，決定用化妝品做顏料，效果出乎意料地好，果然有藝術天分。
父親係鞋王鄺海鑾的「鞋王千金」鄺紫凌原來都係讀設計出身，佢話自細父母會帶埋佢見客，接觸得多唔同嘅設計師及靚嘢自然受熏陶，現時佢育有一子一女，都會採取同樣做法，間中都會帶子女一齊見客，眼見十歲女兒除咗鍾情學繪畫外，仲話希望去英國讀設計添！
卓妮