近年，隨着網上購物的興起，速遞行業發展蓬勃。但由於行業人手嚴重短缺，貨件量急增令速遞員的工作量上升，特別需要經常提舉搬運。阿全從事速遞行業已有十多年，最近他經常感到腰痠背痛、手腳肌肉疲累，晚上更痛得徹夜難眠，苦不堪言。眼見阿全一副沒精打采的倦容，同事阿安上前問個究竟。
阿安：「全哥，最近見你成日行路撳住條腰，一孭起個送件袋就皺晒眉頭，冇嘢嗎？」
阿全：「唉，呢排多咗好多送件，每次出街都要孭住大大個斜孭袋先裝得晒，做到成個人周身痛！」
阿安：「全哥，你應該轉用公司最近派嘅兩用式送件袋，行路時當背囊用，將重量分散腰同臀部；收發貨件時就可以轉番單肩帶，方便拎貨件。另外，如果貨件太大同太重，可以試吓同公司貨車司機配合，將貨件送到目的地附近先畀你，咁就唔使搬咁多啦。如果唔得，應善用公司提供嘅手推車或手拉車搬重嘢，減低受傷風險。」
阿全：「你唔講都唔知原來公司提供咁多嘢幫我哋送件。」
阿安：「係呀，不過我哋自己都要注意個人安全，拎貨同搬貨時，要保持正確姿勢，養成提舉前先屈膝蹲下嘅習慣。當提舉時，應將貨件移近自己，保持腰直，並利用大腿肌肉發力。平時得閒多做強壯背部嘅運動，搬嘢前最好先做熱身伸展運動，咁樣可以大大減低提舉搬運時受傷嘅機會。」
職業安全健康局
www.oshc.org.hk