政情：六華仁仔帶住矛盾入立會

上屆立法會最少有四名「華仁仔」，今屆有幾多個「華仁仔」，「雜碎：香港華仁書院舊記憶」fb專頁貼文就畀咗答案，事關專頁貼文恭喜六名「華仁仔」當選，並獲得逾百個讚好，當中建制派三人、泛民兩人及本土自決派一人。

工聯會成最大戶

如以畢業學校劃分，三人畢業於香港華仁書院，分別係由勞工界轉戰香港島直選當選嘅郭偉強、新界東直選當選嘅青年新政梁頌恆、資訊科技界莫乃光；九龍華仁書院舊生則有喺九龍東直選當選嘅謝偉俊、勞工界自動當選嘅工聯會何啟明，以及喺俗稱「超級區議會」嘅區議會（第二）功能界別當選嘅民主黨涂謹申；如以政黨政團劃分，工聯會最大戶有兩名「華仁仔」立法會議員。

六名「華仁仔」嘅政治光譜，建制泛民、本土自決都有，唔知會唔會帶住矛盾喺立法會相認，甚至有劍拔弩張嘅場面？梁頌恆喺fb率先留言，一來話華仁最偉大嘅地方，就係同一個地方嘅政治光譜可以咁闊，二來又有言在先，直言還望各位師兄記得以前所學嘅，be a man for others，唔好助紂為虐。

另一名「華仁仔」郭偉強就話華仁本身主張開放開明，最緊要大家有服務市民嘅心，集中搞好經濟民生；佢其後又語帶感慨咁話，大家可以以完美為目標，之不過呢個世界係冇完美，重申理念同現實要結合，否則難以解決問題，唔知郭偉強呢番言論，係咪對某啲人嘅肺腑之言呢？

「理大教師」多兩席

其實，新當選嘅香港眾志羅冠聰同青年新政游蕙禎都係嶺南大學學士畢業，再加上嶺大博士畢業嘅衞生服務界李國麟，「嶺南幫」就有三人，同樣係議會新丁嘅九龍西劉小麗同新界西鄭松泰喺理工大學都有教席在身，加上連任嘅黃碧雲同張超雄，「理大教師幫」都有四人。