好多女仔都話愛做運動，之不過能夠做到每星期做兩三次運動，每次做45分鐘就唔係咁多，但係大家只要見識過松元繪里花呢位運動系美少女嘅身材之後，相信女士們一定會以佢為目標努力做運動，男士們亦都一樣，因為唔做多啲運動想追到繪里花呢類健美小花都幾難！
早前小弟為大家介紹過一位日本寫真界運動系索女，佢就係近期經常為日本職業棒球比賽舉行開球禮嘅稻村亞美喇！亞美佢生得高挑，身高5呎8吋，上圍仲有E Cup咁勁，加上全身上下都充滿陽光氣息，火速成為寫真界新貴。至於今日同大家介紹嘅松元繪里花質素同稻村亞美差不多，而且更加嬌俏可愛。現年20歲嘅繪里花面圓圓，論美艷程度係冇瓜子口面嘅妹妹仔咁標致，但係雙目有神又明亮，嘴角滿含春色，閉起雙唇都好似對住你微笑咁，氣質甜美迷人又夠天真純情，認真人見人愛。身材方面，繪里花雖然冇稻村亞美咁高挑，但係亦屬於長身苗條型，5呎6吋身高配上C Cup上圍、水蛇腰及一雙修長美腿，夠晒吸引，仲散發出一股令男人精神一振嘅青春活力添！
繪里花就讀初中二年級時，有一日佢逛福岡一間商場，因為天生麗質被藝能事務所睇中搵佢做模特兒；到佢高中二年級去東京畢業旅行時，繪里花又畀模特兒公司睇中，為咗工作，於是阿妹經常福岡、東京兩邊走喇。直至2014年，繪里花成為時尚雜誌《RAY》嘅專屬模特兒，才正式進駐東京搵食。最近繪里花成為新一代水着代言人，亦因形象健康而獲邀為職業棒球賽擔任開球禮，名氣可謂與日俱增！其實繪里花嘅上位唔係偶然，全靠不斷努力做運動，鍛煉出一副健美身材，成功建立健康感十足嘅運動系少女形象。據聞阿妹保持每周做兩至三次運動嘅習慣，包括瑜伽及打泰拳。另一方面，繪里花原來係長跑好手，上年就參加過檀香山半馬拉松賽事。希望繪里花繼續努力做運動，咁我哋班男士就可以繼續欣賞到身材咁弗嘅美少女喇！
簡介：喺松元繪里花嘅博客中可以見到好多阿妹嘅自拍照，而且張張都笑得好甜，心情唔好嘅話，Click上去睇兩眼成個人都會開心晒！
網址：http://lineblog.me/matsumotoerika/
年齡：20歲
身高：5呎6吋
三圍：32-23-33
撰文：賢