中環出更：立會老鬼指路：健身室 10樓 殺氣大
新一屆立法會會期下月中開始，放棄連任的現屆「老鬼」議員陳偉業（大舊）喺fb貼文向來屆新丁教路，指立法會健身室嘅跑步機「殺氣」重，經常使用嘅議員紛紛落選，中咒率更高達百分之百；另一高危地區係頂層十樓，使用嗰樓層嘅現屆十二名議員中，僅一半人喺來屆「生還」。
落選中咒率百分百
貼文指民主黨（白鴿黨）李永達任議員期間，經常出入立法會健身室，結果喺二○一二年連任失敗；然後何秀蘭、李卓人亦經常用健身室內跑步機，范國威亦偶爾會用，結果三人不約而同敗選「無得留低」，中咒率達百分百。
喺立法會頂層十樓亦殺氣好大，屬「生人勿近」，目前使用嘅十二名現屆議員中，半數唔係退休就係敗選，包括大舊、黃毓民、范國威、陳婉嫻、王國興同鄧家彪；而「生還者」中，張超雄同陳志全（快必）喺選舉初段民調瀕臨出局，梁國雄（長毛）更僅靠以不足千票保住議席，只有黃國健、郭偉強同麥美娟較順利連任。傳聞呢啲嘢，當然唔可以盡信，但今屆失落新東同超區兩席嘅工聯會，唔知會唔會「怕邪」而調去其他樓層呢？
卓妮