前人種樹，後人乘涼；前人種禍，後人遭殃，真係一啲都冇講錯，好似「雙非」問題咁吖，留下一大堆爛攤子，除咗孕婦爭醫院床位，細路爭學位，家陣仲發展到有父母遺棄弱智子女，問你服未！
話說一名八歲雙非女童日前被遺棄喺上水彩園邨，當時身上留有字條，原來佢父母係內地人，因為女童患有裂顎，加上係智障人士，行動同溝通能力都有問題，無力撫養之下，惟有交畀香港社福機構代為照顧。
冇錯，小朋友身體有缺陷，父母眠乾睡濕，心力交瘁，加上內地支援不足，嗰種辛酸真係不足為外人道，但點講都好，小朋友係無辜嘅，生得佢出就有責任養大佢，一句無能力就拍拍籮柚，掟畀其他人幫你執手尾，仲有冇再不負責任啲呀。
講開又講，呢類悲劇可能只係冰山一角，係人都知，好多雙非孕婦事先根本冇做產前檢查，等到臨盆一刻至衝急症室，唔單止導致床位不足，部分父母更加將有缺陷小朋友留低喺醫院，自己一走了之，關人個關，當中比較幸運嘅，可能被好心人收養，至於冇咁好彩嘅，就可能要入住院舍終老，類似社會悲劇都唔知有幾多！
講到呢度，功夫茶有必要同大家溫故知新。○一年莊豐源案，明明父母唔係港人，根據之前人大釋法，只有父母一方九七年前係香港永久居民，子女至有居港權，點知有政黨高舉所謂人權，代為出頭打官司，結果莊豐源獲勝訴，就此種下「雙非」問題禍根。最好笑嘅係，港府仲以為執到寶，前特首曾爵士話要借勢發展醫療產業，之後港府鼓勵港人生育失敗，甚至諗過吸納內地雙非童作為人口生力軍，結果搞出個大頭佛。
事實證明，雙非孕婦搶床位只係「甜品」，之後雙非學童搶學額至係「主菜」。呢幾年小學學位一係供過於求，「殺聲四起」，一係就僧多粥少，部分學童被派到冇雷公咁遠返學，搞到怨聲載道，講嚟講去，都係因為港產官僚胡混度日，連雙非學童幾時來港都一頭霧水。可以預言，今日係學額問題，第時醫療、住屋等問題，一樣大把手尾跟。仲有吖，中港矛盾愈演愈烈，追源溯始都係雙非童被指搶奪社會資源，加上部分政客乘機「播獨」，香港咪搞成今日七國咁亂囉。
所以話，官不殺伯仁，伯仁因官而死。如果話父母遺棄弱智子女係不負責任，港產官僚冇知覺冇神經，「雙非」問題尾大不掉，七百萬市民雞毛鴨血，先至係最大嘅不負責任吖！