政情：何偉權辦鐵窗藝術展 望警惕年輕人珍惜自由
中華廠商聯合會（廠商會）會董何偉權（Ken）最近好忙碌，事關身兼商界助更生委員會主席，首次聯同廠商會及懲教署合辦在囚人士藝術展，希望為在囚人士提供心靈支持之餘，亦可告誡青少年千祈咪犯罪，否則會付出失去自由嘅沉重代價。
藉創作反思所犯過錯
呢個名為「鐵窗藝術的曙光」展覽將於本月下旬舉行，屆時會展出廿幾幅畫作、3D藝術作品及手工藝等。Ken身為今次展覽活動籌委主席，梗要親力親為。佢話，有宗教福傳組織一直協助在囚人士藉住藝術創作過程反思所犯嘅過錯，呢啲係一種心靈治療，所以今次獲福傳組織協助先可成事。
喺今次展品中，Ken最欣賞兩幅被判終身監禁囚犯所畫嘅油畫《死角》及《與受害者的對話》，佢哋仲寫下懺悔心情，最啱血氣方剛嘅年輕人去欣賞，相信呢種「震撼」教育嘅效果，好過師長講到口乾啦！