政情：唔留戀行會 「思」疑想跳船
現任行政會議成員陳智思（Bernard）早於○四年獲委任加入行會，直至○九年先離任，但三年後、即一二年再度獲委任，所以曾與三屆特首共事過，算係極具經驗嘅行會成員。不過，Bernard尋日接受傳媒訪問時竟然話，下屆無論邊個出任特首，都唔認為自己仍然係合適嘅行會成員人選，說法惹嚟跳船疑雲。
Bernard話，佢已出任多屆行會成員，所以傾向將機會留畀其他人，暗示唔會留任行會成員。佢話下屆行會成員將由下任特首決定，認為行會應不斷有新面孔幫助政府，由不同人將聲音帶到行會。
願接受其他公職
向來有「公職王」之稱嘅Bernard，雖然打算卸下行會職務，但就唔抗拒擔當更多公職，佢話如果幫到手，而有關公職毋須放棄職業都會考慮出任。照咁睇嚟，其實Bernard仍有時間同條件接受政府任命，只係抗拒行會成員身份，唔知佢想做咩公職呢？