政情：選舉處頻甩轆 建制加入聲討

模擬選票 候選人數不符

選舉處由周日開始喺全港四個地方設立模擬投票站，等選民可以提早熟習立法會選舉投票程序。有建制派政黨尋日去到位於大埔社區中心嘅模擬投票站抗議，批評模擬選票與現實情況不符，指新界東直選現實上明明有二十二名候選人，但模擬選票上就只有二十個號碼選擇。至於俗稱「超級區議會」嘅區議會（第二）功能界別，明明有九名候選人，但就只有八個號碼選擇，擔心建制派選情會因為咁而受影響。

有建制派候選人團隊成員表示，有街坊試完模擬投票，以為心儀嘅候選人無參選，因而唔會參與正式投票，認為「好大件事」，要立即投訴；又質疑選舉處因為慳錢而使用上次未用完嘅模擬選票，令選民接收錯誤訊息。佢哋隨即向選舉處職員遞交請願信，要求選舉處作出更正。選舉事務處回覆指，模擬選票係提早印製，以便騰空印刷檔期印製真正選票，所以唔可以因應提名期後確實嘅候選人名單數目而印製模擬選票。

票站被偷拍 或內鬼洩密

除咗模擬投票甩轆，近日亦都有人偷拍到票站主任將選票及選民名冊預早帶返家中保管，而且用嚟裝選票嘅行李箱更未有上鎖，引起外界擔心選票會否有機會被人做手腳。不過，票站工作點解會被人偷拍到呢？係咪有內鬼將機密資料外洩呢？搞到咁大件事，馮驊都仲未出嚟解釋，會唔會太不負責任呢？

此外，因為支持港獨而被取消參選資格嘅沙田區議員陳國強亦向選舉處「翻舊帳」，佢尋日聯同幾名支持者踩上選舉處灣仔辦公室，投訴今年初新界東補選票站票箱失匙事件係另有內情，擔心選舉會出現黑箱作業，要求選舉處將票箱當夾萬看待，加設GPS追蹤器及防盜裝置，以防有人做手腳喎。一波未平一波又起，咁多甩甩漏漏，睇嚟選管會及選舉處真係要好好檢討喇！