中環出更：轟漢奸黎賣港 三批示威者接力怒吼

尋日早上約十一時，卅名聲稱自發人士到漢奸黎寓所外示威，佢哋手持印有「黑金黑心黎智英　賣國賣港賣國賊」嘅橫額，又高舉有「黑金肥黎　賣國禍港」、「肥黎賣國　毒果害民」、「賣國黎賊　遺臭萬年」紙牌，並高呼「漢奸黎智英　賣國賣港」口號，逗留約一小時後離去。下午四時左右，佢哋又折返示威，半小時後離開。

狠斥蘋果報道失實

另一批二十五名同樣聲稱自發人士就喺大約中午十二時四十分到達漢奸黎寓所，高舉「佔中亂港　不能容許」、「報道不實　捏造新聞」、「黑媒禍港　罪延下代」嘅橫額，高呼「蘋果報道失實誤導市民，敗壞香港名聲」口號，佢哋逗留至下午一時半離開。

第三批為數二十人嘅示威人士，大約喺下午一時左右到場，部分示威者手持五星旗，以及寫有「黑金黎智英惡貫滿盈　禍亂香港天怒人怨」嘅橫額，指黎智英係漢奸及賣國賊，逗留約半小時後離開。

近期針對漢奸黎嘅示威行動不絕，自六月十日起計，包括尋日行動在內，到漢奸黎寓所同將軍澳壹傳媒大樓外示威嘅行動最少有六十三次，當中自稱霸王國際集團員工同苦主就佔咗十次、正義聯盟佔三次，旅遊業界同其他人士就有五十次。

卓妮