中環出更：李鋈麟帶機械寵物 激活老友記
現代人愈嚟愈長壽，安老服務變得非常重要，東華三院日前舉辦「耆」力無窮午間派對，一班董事局成員齊齊出動到旗下新落成嘅院舍與長者同樂，主席馬陳家歡（Katherine）上台與一班較年輕嘅長者試玩無伴奏合唱，副主席李鋈麟就攬住一隻公仔，點解？原來呢隻公仔係專畀長者玩嘅互動機械寵物，會畀唔同反應，可刺激認知障礙症長者嘅大腦。
李鋈麟話，摸吓呢隻公仔個頭佢會眨眼，個身亦會郁動，而摸佢啲鬚隻公仔就會有唔開心嘅反應，除咗可以訓練長者大腦嘅語言及情緒區域外，仲可以有解悶作用。
馬陳家歡欣賞長者奏樂
講到寵物治療，總理區宇凡都有養龜，仲一養就養咗廿幾年咁耐！佢話龜容易照顧，但龜好長命，除咗養到老，佢遲啲仲可能要教埋個女點養，一代傳一代。
除咗養寵物，仲有唔少方法令長者保持精靈，好似一齊玩吓音樂唱吓歌咁，當日一班長者就以手鈴奏樂相當精彩，曾學過琴嘅Katherine都非常欣賞，話音樂除咗對長者好，對小孩同樣有訓練作用，好似佢六歲嘅囡囡有時會教番佢彈琴，獲取成功感。
總理譚鎮國就話，佢舅父早前生咗個BB，佢婆婆忙住弄孫為樂，仲透露婆婆鍾意煮嘢食，親手炮製嘅蒸肉餅及咕嚕肉令人垂涎三尺。至於總理馬清揚就話間中會陪長者打牌，但唔夠佢哋打喎。
卓妮