選舉時節，又係各路政客表演抽水嘅大好機會，有人甚至連長者搭小巴兩蚊優惠都爭住邀功，簡直笑大人個口，不過比起港府咯喎，政客抽水本領只係小學生程度，有排學嘢吖！
呢，里約奧運曲終人散，雖然今屆香港運動員未能攞牌，但一樣無阻官老爺往自己面上貼金，先係發展局局長陳茂波借牛下女車神李慧詩過橋，吹噓「新界單車徑網絡」嘅所謂政績，結果被踢爆工程一拖再拖，隨時爛尾，抽水抽出禍。好嘞，到國家金牌選手來港訪問，港府又係例牌自吹自擂，爭在未發表聲明「成功爭取」運動員第一站就嚟香港，唔知嘅仲以為班金牌選手係港府培養出嚟添。
勢估唔到嘅係，港產官僚抽完本地同國家隊運動員仲嫌意猶未盡，連英國隊都唔放過。有高官係咁講嘅，英國喺今屆奧運表現突出，主要係因為政府及早喺校園推動體育，培訓有潛質嘅精英運動員。港府將全面檢視體育政策，加強培訓青少年成為精英運動員咁話。
有立法會議員就講得啱嘞，港府忽然話要學英國，都唔知係咪「跟紅頂白」，難保下次第二個國家表現突出，又話要借鏡人哋嘅體育政策。再講吖，家陣啲學生壓力超大，功課排到密麻麻，莫講話唔得閒做運動，連休息都冇時間，好似早排有團體調查就發現，只有三成小學依足教育局指引，畀學生有一百分鐘時間休息，所謂加強培訓精英運動員，講吓笑就得。
呢啲批評絕對唔係無的放矢。大家有眼見，港府發展體育一向葉公好龍，講多過做，由當年「風之后」李麗珊奧運奪金，到上屆奧運李慧詩摘銅，每次香港運動員揚威國際，港產官僚例必頭腦發熱，大計多多，可惜次次都係三分鐘熱度，淨係起一個專業標準單車比賽場地都已經死拖爛拖，又好似啟德體育城咁，如果唔係群情洶湧，老早已經改建為住宅項目。正所謂言為心聲，有高官曾經講到明體育界無任何經濟貢獻，家陣自打嘴巴，聲稱要學習英國，有幾多誠意，唔使多講喇啩！
當然喇，邊個唔知頂尖運動員要由細細個開始培養，問題係成個社會有冇咁嘅土壤？美國高中生一旦被籃球球探發掘打NBA，前途同錢途都無可限量，反觀香港，唔係金融就係地產，想父母畀仔女發展體育才能都幾難。
點都好喇，講一千句漂亮話，不如做一件實事。旨意港府振興本港體育，蚊都瞓蛇都死，不如另闢蹊徑，爭取奧運會增設抽水項目，反正官老爺抽水無國界，有條件抽，冇條件都可以創造條件抽，呢面金牌港府實食冇黐牙。