經常聽人講「佢天生係食呢行飯」，即係指當事人具有一種喺某個行業生存嘅本質，好似戴小唯就正係天生食模特兒呢行飯嘅人辦，事關佢不論外在同內在，都絕對勝任模特兒嘅工作。
生於天津嘅28歲戴小唯，原名戴唯，英文名Mona，佢唔單止擁有高挑嘅身材，三圍更係玲瓏浮凸，加上一雙修長嘅美腿，如此優秀嘅外形絕對適合做任何一種類型嘅模特兒。事實上，佢現時為寫真、車展及內衣模特兒，早喺2009年亦即佢就讀天津工業大學時，已經開始接觸模特兒工作，憑住出眾外在條件，被視為模特兒界嘅新星。畢業後，佢曾經從事日文翻譯嘅工作，之後全職投身模特兒界，又參加過模特兒比賽，獲得最佳人氣獎，更被網絡時尚頻道《美女幫》選為「津城12美釵」，足見佢魅力過人，同時人氣愈嚟愈高，工作量大增，除咗喺各個平面媒體上可以搵到佢嘅蹤影外，又以車模身份於各個國際車展中亮相，與此同時佢進軍寫真界，先後推出過多輯唔同風格嘅寫真集，從古典到時代女性嘅造型都有。作為專業模特兒嘅佢，任何造型都輕易駕馭外，更憑住獨有嘅「戴式微笑」紅爆網絡，因而被網民冠以「戴女王」嘅稱號。
除咗喺模特兒界發展外，佢又以嘉賓身份參與電視節目演出，玲瓏浮凸嘅身材令佢成為節目中嘅焦點，另外佢亦有演出微電影，能夠獲得如此好成績，迷人嘅外在條件固然係佢成功嘅重點，只係如果冇努力同付出嘅話，無論條件有幾優厚，都好難得到咁多演出機會。阿妹有着堅毅嘅性格，令佢喺事業上取得出色成就，但估唔到佢竟然話自己係人格分裂。佢解釋因為工作忙碌，加上佢做事認真，演出時顯得好嚴肅、好Cool，予人難以相處嘅感覺，但係當完成工作之後，佢就變得風趣幽默，而且乜都會笑一餐。話說回來，究竟佢嘅工作有幾咁忙碌呢？佢就話朝早5點半起身，喺一日內進行三個拍攝工作，連續工作超過14個鐘。雖然工作壓力咁大，但係佢一啲怨言都冇，佢話：「拍照就是我的生命。」足以證明佢好熱愛模特兒工作。
簡介：好多人都覺得戴小唯係一個「外表文靜，內心狂野」嘅女仔，但同佢合作過嘅攝影師卻認為阿妹嘅個性係「外表張揚，內心簡單」，究竟邊種至係佢嘅真本性呢？想了解佢更多嘅話，一於（目及）實佢嘅微博啦！
網址：http://weibo.com/u/1695466083?is_hot=1
出生地：天津
身高：174cm
三圍：33、25、35
撰文：魂