政情：北上經商 吳清煥難忘波折
港人多年來北上做生意並唔容易，可謂有血有汗。早前喺活動上遇到中華廠商聯合會副會長吳清煥，講起佢做生意不時穿梭內地不同省份，期間就遭遇唔少甩轆及奇遇，總之波折重重。其中最難忘嘅莫過於多年前於內地坐火車，因為暴雨天氣影響，火車要折返，但佢又一早約好咗個客傾生意，於是就臨時臨急搵朋友幫手撲機票。
訂酒店機位易撞板
吳清煥話，當年機票好難買，一架飛機只有四十四個座位，相當矜貴，而正當大家上晒飛機要扣安全帶嘅時候，先發現多咗個乘客，但架飛機又正要起飛，第四十五個乘客最後要同空姐扣埋一齊，佢啲朋友仲開玩笑話，早知應該最後一個上機喎。
此外，佢又試過因為住開嗰間內地酒店開始殘舊，於是試吓入住新酒店，點知去到畀晒錢登記完之後，酒店服務員先話畀佢聽前一晚打雷劈壞咗啲電掣，打唔到電話，而當年係未有手機嘅年代，去傾生意無固網電話係好大鑊嘅事，結果佢都係要住番原本嗰間舊酒店，仲要畀多咗錢添，真係唔知好嬲定好笑。