政情：大會讓路 冇得拉布
今屆立法會活在激進泛民主派拉布、流會之中，預料十月新一屆立法會只會變本加厲，令立法會大會愈開愈耐。以前大會只開一日，但近年差不多開足兩日半，為咗善用議會時間，據聞立法會秘書處現正研究星期五早上唔開大會，希望騰出時間召開其他事務委員會，同時減少激進泛民拉布的時間，唔知最終能否落實呢？
回歸前的立法局及回歸後早年的立法會，大會召開時間是在下午二時三十分，通常即日就開完，後來議會愈來愈多事項討論，議員亦愈來愈長氣，所以○八年開始，大會就提早至上午十一時開會。不過，近年激進泛民多線拉布，除咗每年嘅財政預算案，仲有多項具爭議法案，好似版權修例、醫委會改革等，大會經常要開埋星期四全日，甚至開到星期五上午，如果星期五下午唔係要留畀內務委員會及財務委員會開會，啲時間肯定會被大會搶埋。
多四小時無助減爭議
為咗善用議會時間，據了解，立法會秘書處提出星期五上午四個小時唔再開大會，將時間留給其他事務委員會。消息指，秘書處考慮到，即使大會開到星期五，都只係得早上四個小時開會，同樣未能解決議題爭議及議員拉布，況且加多幾個鐘開會，激進泛民議員就多幾個鐘拉布，倒不如開少幾個鐘。
此外，現時很多事務委員會，因為大會霸咗星期三至星期五，只能逼晒喺星期一或二開會，但事務委員會其中一個功能是讓政府政策到立法會「過冷河」，過程相當重要，所以就提議星期五上午唔開大會，讓路畀其他事務委員會開會，希望政策有更透徹的討論。
需新會期各政黨共識
新一屆立法會勢將有更多激進泛民議員加入，佢哋又肯唔肯更改召開大會時間呢？其實開會時間係冇寫喺議事規則，立法會主席可以行使酌情權更改，通常只需獲各黨派共識就可以實行。雖然減少大會開會時間嘅阻力未必太大，但最終係咪真係可以做到，就要睇新一屆議員點睇喇。