中環出更：收藏家組協會 名人眾樂樂
收藏心頭好除咗可視作嗜好同娛樂外，亦具有投資價值。早前有個大中華香港收藏家協會（協會）成立，由國際獅子會中國港澳303區前任總監馮炳壽擔任創會會長，協會將提供平台予收藏家觀摩切磋及分享經驗。馮炳壽係一位資深嘅錢幣收藏家，佢深感每件藏品背後皆大有學問，加上好多收藏家都係獨來獨往，欠缺一個交流園地，於是同幾位志同道合嘅朋友組織協會，實行眾樂樂。
馮炳壽嘅收藏嗜好由童年開始，因家人經營飲食業之便，兒時經常接觸鈔票，每遇上「靚冧巴」鈔票就會珍而藏之。其後佢往國內發展，見內地人對收藏錢幣非常熱衷，自己亦受到感染，踏上收藏錢幣之路。後來佢退休，有更多閒餘處理藏品嘅時候，發現當年嘅珍藏，原來已經升咗幾十倍。
曹宏威為佛像捨行李
雖然收藏能領略無窮樂趣，但欠缺交流機會猶如獨行俠。後來馮炳壽於旺角某商場買舖位投資，從而結識商場內一眾經營錢幣郵品買賣嘅友好，並邀請年輕收藏家陳嘉霖擔任協會創會副會長。另外佢亦請到鍾情收藏瓷畫及珠寶嘅香港獅子山獅子會董事林月明任理事會委員。
至於以嘉賓身份出席協會成立典禮嘅生化專家曹宏威博士，年少時就喜歡集郵，後來就鍾情於搜集十八世紀嘅物理書籍，以及不同材質及造型各異嘅佛像。曹宏威話，佛像最能體現東方藝術同中華文化特色，記得十多年前佢曾經為咗喺台灣帶一尊銅製佛像返港，不惜拋棄所有行李以符合飛機嘅載重限制，目前已珍藏四十多尊佛像喇。
卓妮