如果話香港人愛心爆棚，相信冇乜人質疑，事關每有天災人禍發生，香港人都會熱心解囊。之但係，如果問香港人有冇公德心咯喎，應該冇乜人敢理直氣壯回答，事關香港由街道到海洋再到行山徑都垃圾為患，淨係睇吓環保團體周不時執到數以噸計嘅垃圾咪知囉。
咁點解香港人冇乜公德心？除咗固有嘅以鄰為壑民族劣根性，主要係港府宣傳不力同埋減廢配套不足所致。所以話，漁護署計劃下月啟動郊野公園及特別地區路徑第二階段減廢計劃，除咗將全港郊野公園五百多個垃圾箱及回收箱大減一半，所有家樂徑及自然教育徑更擬一刀切變成零垃圾箱，會唔會曲高和寡，適得其反，真係要睇過至知。
係咁嘅，計劃首階段去年九月已經開始，漁護署話五個試點嘅垃圾箱數目減少後，減廢成效顯著，垃圾量最多勁減逾九成，為咗進一步推廣「自己垃圾自己帶走」，今日將開會討論實施第二階段計劃嘅細節喎。
聽落計劃真係幾成功嘅，但實情可能係粉飾太平咋。嗱，本報記者尋日去過行山徑視察，因為天氣炎熱加上係閒日，鬼影都唔多隻，垃圾量的確唔算多，但有行開山嘅市民就話，每逢假日行山徑就垃圾為患，膠樽、膠袋、紙巾被人隨地丟棄，所謂垃圾量勁減，只係自說自話咋。唔少人擔心當局一刀切將所有垃圾箱移走，隨時變成亂葬崗都似，絕對唔係杞人憂天o架。
好簡單，如果人人都咁自律，香港又點會有咁多垃圾灣同埋垃圾山吖。環保團體就講得啱嘞，有關計劃嘅理念無疑正確，但喺欠缺宣傳推廣之下，漁護署貿貿然將垃圾箱數目減至零，隨時好心做壞事。再講吖，郊野公園嘅燒烤場作為生產最多垃圾嘅地方，正正係最需要推廣「自己垃圾自己帶走」，偏偏漁護署將之排除在外，咁做同掩耳盜鈴有乜分別喎？
有辦你睇，食環署早前推出「細口仔」垃圾箱同埋減少垃圾箱數量，話就話係垃圾徵費計劃嘅過渡措施，希望市民將垃圾分類，講就好聽喇，結果弄巧反拙，唔止大件垃圾繼續塞爆垃圾箱，唔少人索性將垃圾掉喺旁邊就算，結果減廢不成，反而搞到清潔工人工作量大增，怨氣沖天，淨係得蛇蟲鼠蟻拍晒手高興。
講到尾，香港要解決垃圾圍城呢個老大難問題，最重要係做好源頭減廢及回收，配套設施及宣傳教育缺一不可。可惜吖，香港冇神經廢官充斥，樣樣嘢都做到唔湯唔水，可以斷言，人形垃圾官僚一日存在，環保想有好成績都幾難咯！