政情：胡曉明狠批奧運慘不忍睹
好多人都會覺得今屆巴西里約奧運好唔掂，真係有欠專業。港協暨奧委會副會長胡曉明（Herman）日前出席活動時直情話，今次奧運係慘不忍睹，醜聞不絕，舉例指有歐洲奧委會主席涉賣黃牛飛、美國泳隊又發生報假案以掩飾搞破壞事件，認為巴西治安咁差，根本無能力舉辦奧運，搞到出現好多管理不善嘅問題。
美國接力隊獨賽混帳
Herman又特別提到，喺女子4×100接力賽預賽，發生美國隊上訴後重賽，而令中國隊失去出線資格嘅事件，佢形容係混帳，話比賽就等如生命，點可以有take two？佢做咗幾十年體育，都未曾聽過有得自己一隊人獨跑喎！
此外，香港專業及資深行政人員協會創會會長容永祺都話，今年奧運氣氛唔係咁好，相信係因為電視台較少播出賽事，而且里約亦離香港比較遠，而佢最留意係中國女排，再忙都一定會抽時間觀賞賽事。