政情：蕭楚基黃傑龍同反標時
飲食業請唔到人嘅問題已持續一段時間，早前我哋見到叙福樓集團執董黃傑龍（Simon）及海皇粥店集團執董蕭楚基，佢哋異口同聲話如果真係有標準工時（標時），唔夠人做嘢嘅情況勢必更嚴峻。Simon話，通常有兩種情況下先需要訂立標準工時，一係失業率高企，可以令更多人有工做；其次就係重工業國家，減少工時可令工業意外減少，但香港作為服務性工作嘅地方，情況並唔一樣。
憂致失業及結業潮
蕭楚基就話，現時飲食業有部分工序請人情況特別艱難，好似洗碗工，幾高人工都請唔到人，部分要判出去畀一啲社企或洗碗工場做，如果實行標時之後，就會有更多工作崗位丟空。蕭楚基本身係伙伴倡自強社區協作計劃諮詢委員會主席，佢認為標時實行後，食肆無可避免要削減服務或開支，部分捱唔住嘅或會陸續執笠，而社企更可能首當其衝。