里約奧運會進入尾聲，獎牌榜埋單計數，又係美國贏到開巷。好多人以為美國佬唔似得中國咁搞舉國體制，獎牌背後唔會使納稅人一分一毫，費用通通由贊助商承擔，咁諗就大錯特錯嘞，用公帑資助游泳等強項，郁吓都講緊數以億計美元，唔係你以為獎牌從樹上生出嚟吖！
所以話，天下無免費午餐，一個地方培養頂尖運動員係咁，發展科研亦一樣。有團體下個月舉辦展覽，分航天、航空、深潛等八大主題，展示內地近年嘅科技成就，展品包括自主研發嘅大型客機，以及能深潛至海底二萬呎嘅「蛟龍號」潛水器等四十幾項頂尖科研項目，認真大堆頭。至於本港科技成就，淨係會設立專區展示獲取國際大獎嘅本港科研項目，似乎相形見絀咗啲囉。
唔知係咪有感而發，作為活動顧問嘅港科院創院院長徐立之話喎，現時本港總科研開支只佔生產總值百分之零點七，其中公營研發開支更僅佔生產總值百分之零點四，遠遠落後於南韓、日本以及新加坡等競爭對手，建議港府未來十年將公共科研開支逐步提升至本地生產總值嘅百分之一。
話時話，徐教授當年執掌港大，已經多番批評港府對大學科研投放不足，幾間大學嘅科研經費加埋都唔夠內地一間普通大學。官老爺手緊都算嘞，仲學埋晒曾蔭權爵士「精叻香港仔」籠嘢，想話刀仔鋸大樹，對於無法即時獲得經濟效益嘅項目耍手擰頭。係人都知，重要科研成果冇番十年八載，都好難話轉化為商業收益，港產官僚急功近利，鼠目寸光，點會成功吖！
港府對科研扶持不力，唔止學界鬧爆，商界亦怨聲載道。騰訊老闆馬化騰前排就直指香港科技發展「總是差了那麼一點」，公開呼籲港府加強吸納科技專才。問題係，香港地唔係金融就係地產，過江龍固然無用武之地，本地薑亦要另謀出路。呢，好似近年風生水起嘅大疆無人機咁吖，原本就係由幾名科大生創立，結果咪又係喺香港做唔住，被迫北上深圳發展。
港產官僚就係咁嘅嘞，講就天下無敵，做就無能為力，現屆政府口口聲聲要將經濟個餅做大做闊，點知淨係成立一個創科局已經拖拖拉拉，幾乎難產；同知識產權息息相關嘅版權條例修訂草案，又因為無良政客拉布而被迫作罷，仲話鼓勵創意產業，盞笑大人個口。本港科技產業愈做愈縮，甚至被深圳後來居上，依家知點解喇。
一句到尾，廿一世紀嘅競爭就係科技實力嘅比併，港府坐而論道，故步自封，長此下去香港只有死路一條嘅咋！