港大學生會刊物《學苑》的封面文章愈來愈激，最新一期以「帝國瓦解，香港觸殖」發表妄言，指中國是「步向滅亡的帝國」，揚言香港獨立需要不斷而有效的抗爭，必須要抱着與殖民者「攬炒」的準備，有予及汝皆亡的意志。如此公然煽「獨」，顯然已過了阿爺的底線，內地官媒指其炮製出僅得三百多人參與、不具代表性的民調，擔心民調散發的港獨思潮對不少學生產生不良誘惑。
一間百年學府，近年排名節節下降，部分學生的無禮野蠻，實在有失斯文；曾是本港的龍頭大學，如今竟敗壞在一小撮邪惡教授、有心搞事嘅學生手上；學生會刊物不見有分量的學術論文，竟然出現鼓吹「香港民族命運自決」嘅春夢，春夢也許已經了無痕，於是又要鼓吹予及汝皆亡的「攬炒」。大學之道，在明明德，在親民，在止於至善，「明德格物」係港大嘅校訓，如今卻不斷沉淪，令人痛心。
作為港大學生，唔該唔好咁無知幼稚，講啲完全不接地氣嘅廢噏。你不以中國人為榮冇問題，你唔妥中國、不愛一國兩制下的香港都冇問題，冇人阻止你移民或飄流出海做難民o架！但係思想幼稚成咁，有份納稅供養你哋接受高等教育嘅市民，肯定條氣唔順！英國哲學家懷特海曾說：「在中學階段，學生伏案學習；在大學裏，他應該站起來，四面瞭望。」站起來，唔係要「讓磚頭飛」，唔係要「攬炒」，係要走出象牙塔，睇清楚當今天下誰主沉浮，若心態仍停留在滿清「八國聯軍」嘅時空，那你的大學是白唸了，既浪費納稅人金錢，又浪費自己的青春，如此「雙失」，愧對父母也愧對生命。
作為港大學生，好應該學習吓你哋嘅校友孫中山先生是如何搞革命，如何一步一個腳印去改良及改變中國，講評孫中山嘅著作多如牛毛，老朽推薦黃宇和的《三十歲前的孫中山》。