政情：劉國勳入議會 主打運房政策
北區區議員劉國勳自動當選立法會區議會（第一）功能界別議員，佢話本身喺區議會對房屋、交通、跨境學童問題都好熟悉，估計入立法會後都會主打運輸及房屋政策。佢又提到會關注新界原居民利益，因為佢媽媽係原居民，細個喺圍村長大，所以明白原居民嘅苦處，事關有丁權都冇地起屋，有地嘅又要跟足政府土地規劃用途，好多限制，期望在原居民問題上可以做到多啲。
雖然劉國勳自動當選，但佢仍要忙於幫黨友拉票，又呻舊年區議會選舉至今都無去過旅行，搞到太太呂迪明已經唔等佢，自己去咗兩次旅行喇。九月選舉過後，佢話可以抽時間去幾日短途旅行，但應該都係去東南亞。講到平時假期有乜消遣，劉國勳自爆放假會做「毒男」，包括煲漫畫同釣魚，而漫畫就最愛《男兒當入樽》同《聖鬥士星矢》，睇咗好多次，仲話前者夠晒熱血添！