政情：民調謬差 港大雙耀受靶

政黨斥調查漠視「抬轎效應」

人民力量及社民連多個成員，尋日開記者會鬧爆港大民研所公布嘅民調，批評今次民調喺調查時只讀出排頭位嘅候選人名字，漠視咗「抬轎效應」，即係由一個現任議員排第二，去支持排第一嘅新候選人發揮嘅效果，令到好多候選人嘅支持度被低估，同時民調嘅誤差值高達百分之零點七至八，所以民調根本就唔準確。他們更怒斥鍾庭耀作為資深學者，竟做出不盡不實嘅民調、誤導公眾，要求鍾負責任。

除咗人力及社民連炮轟外，亦有其他泛民政黨表明唔信任民調，好似民主黨就話，該黨有部分名單，若提供排第二嘅候選人名字，支持度就會急增一倍，所以該黨會自行分析同樣數據，唔會盡信港大民調。而新民主同盟就認為，民調中較為落後嘅候選人目前面對「弱者愈弱」嘅情況，擔心選民會因為民調結果，以「西瓜靠大邊」嘅心態，放棄排名較後嘅候選人。

指被要求只讀排頭位候選人

不過，有泛民中人引述鍾庭耀解釋，係民調委託人要求港大民研喺調查時只讀出排頭位嘅候選人名字。而本報尋日曾經向港大民研查詢，但回覆係今日會向公眾交代事件。

其實最令泛民擔心嘅係戴耀廷發起嘅「聰明選民計劃」，會利用呢項港大民調作為基礎，投票當日會要求每區一萬個嘅聰明選民，投畀民調顯示所謂嘅「邊緣」候選人，最終影響成個選舉結果。對於大眾對民調嘅憂慮，戴耀廷尋日就喺facebook上力撐民調，指民調能識別邊緣名單，邊啲人需要策略性配票；又解釋邊緣名單太多，係因為出選名單太多，同準確度無關喎。依家點解釋都好，最後無論邊方選舉失利都會歸咎於今次調查，未知鍾庭耀如何力保名聲呢？