中環出更：公職王黃遠輝拒入熱廚房
銀行家黃遠輝（Stanley）退休後熱衷公職，素有「公職王」之稱，目前擔任嘅公職有房屋委員會資助房屋小組委員會主席、市建局非執董、歷史博物館諮詢委員會主席、能源諮詢委員會，以及環境諮詢委員會委員，由起樓到拆樓，以至環保及文化都有涉獵。最近佢分別卸任城規會副主席及香港舞蹈團主席，原因係佢喺兩個位都做滿六年上限，先至好唔捨得咁退落嚟。
唔想「有返工冇收工」
雖然退咗兩項公職，據悉Stanley嚟緊會擔任離職公務員就業申請諮詢委員會成員，負責審批離職高級公務員從事外間工作嘅申請。據了解，Stanley曾出任首長級薪常會，熟悉相關操作而獲邀入會。咁鍾意做公職，但Stanley聽到入政府「熱廚房」就即刻耍手擰頭，話自己任職銀行三十幾年工作無時停，唔想再重返「有返工冇收工」嘅生活，寧願攬多啲公職去幫助社會就夠喇。
卓妮