中環出更：工商界嘆港人不快樂
香港人工作壓力大，快樂指數經常處於世界排名低位，一班工商界人士喺六年前就發起香港提升快樂指數基金（基金），希望能夠為港人傳播更多快樂。基金會長陳國民（Edward）話近年香港嘅快樂指數有所提升，但整體仍然唔及以前，難怪基金早前專登為一群弱勢社群搞活動喇。
Edward認為，香港人過於着重金錢同物質，而近年經濟又下滑，港人嘅快樂指數就自然跟住經濟一齊下跌。佢仲話近年政治爭拗繁多，所以令到港人更加唔開心，希望遲吓政治環境會有新氣象。
鍾志平冀住屋問題可解決
基金聯席主席鍾志平亦都有類似嘅睇法，佢曾經去過不丹、內地山區旅行，留意到當地嘅資源及生活質素雖然唔及香港，但從當地人嘅表情依然感受到佢哋嘅快樂。
鍾志平認為，香港人唔使為衣、食、行而憂心，但無奈普遍港人目前都受到住屋問題困擾，只好寄望呢個問題可以解決，令港人重拾笑容。
今次活動邀請咗一百位來自單親或低收入家庭小朋友到美食博覽，並提供一百元畀佢哋購買食品，再由營養師教導健康知識。同場嘅基金義務法律顧問吳永嘉（Jimmy）本身都食得好健康，佢透露平日好少食油炸食物同零食，而且自細就唔鍾意食甜嘢，再加上適量運動，難怪身材咁標準喇！
基金義務總幹事陳詠梅（Helen）亦都大讚呢班小朋友生性，因為小朋友購物時，竟然首選家庭所需嘅食品，而非只顧自己，一味購入零食，難怪Helen對佢哋讚不絕口。
卓妮