政情：公民講場：遊行嫌路遠民陣腳仔軟

鑑於多名主張港獨嘅人士被取消參選立法會資格，民間人權陣線（民陣）同部分泛民政黨將於下周日發起遊行反政治篩選。民陣尋日同警方商討當日遊行嘅安排，但雙方就遊行路線出現分歧，警方唔想民陣直接經添華道前往特首辦終點。民陣召集人岑子杰會後話，唔接受警方以有衝突為由，要求遊行隊伍兜路去特首辦，又形容兜路要行多三倍路喎。老實講，話明係遊行，當然要行o架啦，都行到落金鐘咯，唔爭在行埋嗰少少路啦！否則不如直接叫人喺特首辦外集合罷啦，咁咪唔使行囉，仲慳番唔少腳骨力同精力示威添！