古人話，食以安為先，唔係齋噏當秘笈o架！好似漢代咁，對食品安全有嚴格監管，除咗販賣腐肉要受懲處，官員冇依法銷毀問題肉類嘅，亦會受到連坐處分，邊似得香港食安官僚咁，把關不力，搞到老百姓冇啖好食，都仲可以老神在在，好官我自為之吖！
就講哮喘毒豬流入市面呢單嘢吖，負責為豬隻驗尿嘅漁護署一早發現有問題，而政府化驗所之後亦確認涉事豬隻含有哮喘素殘留，點知批貨照樣被屠宰及分銷到各零售點，食環署更加喺發現問題後近二十小時至施施然到零售點進行封存，期間唔知幾多市民食咗毒豬落肚。你哋話嘞，如果按照漢代法律，班官係咪應該拉晒去坐監吖！
根據「梅菲定律」，凡係可以出錯嘅環節都會出錯，哮喘毒豬事件就係一場咁樣嘅災難嘞。食環署封存問題豬肉錯失先機都算嘞，根據批發商提供嘅資料封存問題豬肉，結果又因為資料過時，多個商販被點錯相銷錯豬，唔見一大筆之餘，商譽更無端受損。正如「東方報業民意調查」顯示，大部分受訪者批評食品追蹤機制漏洞多多，當局後知後覺連累無辜，簡直累人累物。
哮喘毒豬搞到人心惶惶，怨聲載道，港產官僚例牌又係急急補鑊，食物及衞生局局長高永文承認把關程序出錯，兩度公開致歉，話會檢討現行機制；又話會考慮向受影響零售商作出賠償。即係咁，你搞到人哋雞毛鴨血，賠償就梗o架啦，之但係羊毛出在羊身上，又唔係高局長閣下自掏腰包，講到尾又係慷納稅人之慨！至於檢討，類似公關騷市民早就見慣見熟，咪畀人睇死，所謂檢討都係走吓過場，千錯萬錯都係制度嘅錯。
有團體就講得啱嘞，檢討復檢討，但從來無官員問責，無壓力改善服務質素咯喎，唔頻頻出事至奇。呢嗱，呢頭哮喘豬肉問題仲未解決，嗰頭又有街市嘅新鮮牛肉樣本驗出含禁用防腐劑，市民簡直有得震冇得瞓。
係人都知，本港大部分食品依賴進口，近年內地同台灣問題食品多如牛毛，蘇丹紅、孔雀石綠、坑渠油、黑心茶葉……五花八門，無奇不有，偏偏食安官僚好似瞌緊眼瞓咁，以致黑心食品如入無人之境，市民真係多得佢哋唔少。大部分受訪者批評當局執法不力，威脅市民健康，係食安問題不絕如縷嘅元兇，絕對唔係無的放矢。
咪話功夫茶唔提醒，家陣香港地危機四伏，除咗食安危機，日本腦炎、寨卡病毒以及登革熱等「三毒」蠢蠢欲動，一個唔好彩爆大鑊，呢隻鑊官老爺孭唔起o架！