教協副會長葉建源宣布參加九月立法會選舉，競逐教育界功能組別議席，他跟對手蔡若蓮辯論時強調自己不贊成港獨，但認為中學生有權自發了解港獨，老師如覺學生認識不夠全面，可與學生交流，但不應將個人想法強加於學生。
中學推行國民教育，你哋同學民思潮就用「洪荒之力」要政府撤回，其實推行國民教育可以加強學生嘅德育、公民意識，又可令學生認識中國、放眼世界，老朽百思不得其解，外國可以行之，何以香港設立有關科目就叫「洗腦」？如今又話在中學成立本土關注組討論港獨冇問題。阿哥，推行國民教育就係洗腦，成立關注組討論港獨就唔係洗腦？作為一個資深教育工作者，人妖顛倒是非淆到如此地步，請恕老朽無禮：唔該收皮，放過孩子吧！
香港今日已經亂到阿媽都唔認得，反中亂港嘅爛果報，日日鼓吹港人走獨立之路，加上一班戇血「革命烈士」以及無恥政客，當然仲有一班廢柴高官，把關不嚴，錯漏百出，讓公然鼓吹港獨者參選立法會，老朽放長雙眼睇吓佢哋有冇跟進事件，有冇認真審核有關人士是否觸犯「虛假聲明」。律政司司長袁國強唔該醒少少，唔好自廢武功又捍衞唔到《基本法》同「一國兩制」，到時又推說是「制度的錯」！
香港今日亂成一鑊泡，搞教育嘅唔係為學生謀出路，激勵佢哋努力讀書，自我增值，而係鼓吹佢哋去討論一個偽命題；漢奸黎煽動「港毒」更是不遺餘力，卻在外國鋪定後路，居心之歹毒，人神共憤也。唔好忘記，孫中山先生當年都係先懸壺行醫才搵到革命同志，如今政客要中學生一步登天，唔好好讀書而去清談甚麼港獨、民族自決，那是完全不負責任的妖言惑眾，老朽在此予以強烈譴責！要討論，先同你哋嘅仔女討論喇，叫佢哋咪留學英美，速速回港關注本土同你哋一起去革命吧！