康文署大花五百萬元喺五個體育館中，設立觀賞站播放奧運賽事精華片段同其他活動，但就被指宣傳不足，導致場面冷清，康文署其後先至認衰補鑊，喺士美非路體育館直播多場賽事，包括前晚香港單車代表李慧詩出戰嘅凱林賽，同埋尋日香港羽毛球代表葉姵延同伍家朗嘅賽事，先至吸引多啲市民去睇。呢次事件反映康文署署長李美嫦後知後覺，好彩畀人鬧完都識得變招，否則幾百萬元就咁倒晒落鹹水海嘞！
