政情：今日你上鏡：工記新小花彈出講反「獨」
多名政壇前輩紛紛退休，各政黨都開始吸納新血，以免青黃不接。工聯會（工記）亦唔執輸，吸納唔少年輕會員，最近就有從事商貿工作嘅Regina「彈出」。Regina尋日首次亮相工記活動，打扮斯文大方，不過可能女孩子比較害羞，睇嚟要多啲出席公開場合活動壯壯膽嘞！
Regina暫時只係喺公餘時參與工記活動，但未來未知會否踏上從政之路。佢透露，因認同工記幫助基層嘅理念，所以今年經朋友介紹下而加入，只有幾個月嘅資歷。工記理事長吳秋北透露，Regina頗活躍參與工記活動，所以今次有公開活動亦邀請佢參與，吳秋北亦希望未來能吸納唔同階層嘅年輕人加入。
近年港獨思潮崛起，好多年輕人紛紛轉向支持主張港獨嘅本土派，而Regina就強調唔支持港獨，亦認為現時社會太多政治紛爭。佢話同朋友較少談及政治，家人知道佢加入工記亦冇反對。面對現時嘅政治紛爭，Regina希望社會可以給予年輕人更多機會。