政情：中大學生會爆竊聽恐慌
早前樹仁大學學生會喺社交網站facebook（fb）上指有人冒充學生喺校園徘徊，混亂中仲搶咗「佔中輔警」、學生會會長楊逸朗嘅手機。中大學生會尋晚喺fb專頁上發貼，指午夜時分有可疑人士喺學生會會室外徘徊，除咗望會室內嘅情況，仲量度埋該室嘅門窗尺寸，並作記錄。中大學生會會長周竪峰接受查詢時話依家未有打算報警，但認為該男子量度門窗尺寸嘅行為有可疑，擔心會室遲啲可能被裝竊聽器又或者係閉路電視。
可疑男子會室外徘徊
周竪峰仲話事件喺幾日前都發生過，但由於會室外面係公眾地方，有懷疑過該可疑人士有機會係中大學生，所以未有打算報警處理。佢話早前樹仁大學學生會都發生過同類事件，擔心事件會喺中大重演，所以依家喺fb上作出公告，希望事件可以盡快解決。
根據中大學生會fb上嘅貼文，前晚當學生會幹事發現嗰個可疑男子時，即刻步出會室打算上前查詢，但該男子隨即逃去。幹事亦曾聯絡過學校保安，但保安都搵唔到可疑男子。