政情：葉劉缺席論壇 陳淑莊抽水

網民批陳發言冇品

葉劉缺席前日嘅論壇，由名單其他人代替，其中陳家珮同王政芝都係大肚婆。陳淑莊當時主動進攻，問點解葉劉冇影，對方只係話「我們各有分工」。陳淑莊事後喺facebook（fb）以「我做唔出囉」為題，質疑葉劉缺席，要兩位大肚婆代佢頂晒所有發言同質詢，又話唔係歧視孕婦嘅能力，但質疑葉劉成日話維護女性權益，應該親自應付論壇，唔係將「咁刺激嘅工作」畀佢哋，諷刺「點分工呀？佢哋選立法會，葉劉去選特首？」

同一時間，葉劉就喺fb還擊，話上星期三開始覺得肌肉痠痛、發燒，十分疲倦，翌日晚上證實感冒，雖然食咗抗生素，但咳嗽依然嚴重，要食埋含類固醇嘅藥，因為未完全好番，所以要兩名大肚婆替佢上陣，仲上載一張戴上口罩嘅相。葉劉直言對佢哋十分有信心，亦畀佢哋有鍛煉機會，更點名陳家珮「戰鬥力十足」。陳家珮亦喺fb話呢個係非常難得嘅鍛煉機會，又指電台方面照顧有加，逢休息時間就會攞圓櫈畀佢哋坐，完全冇問題。

葉劉斥殺雞焉用牛刀

而葉劉喺幾個鐘後又喺fb透露，前日農曆生日，下午去咗石澳村探訪村民，咖啡店主唔單止請佢食厚多士，仲送咗一包馳名梅菜王畀佢做生日禮物。有網民就質疑葉劉講到病情咁嚴重，但仲可以食厚多士而唔去論壇，又問點解陳家珮等人當時唔講清楚葉劉因病缺席；但亦都有網民反擊陳淑莊發言冇品、強詞奪理。

有同區男性候選人尋日亦繼續狙擊葉劉，質疑佢扮病，葉劉直斥「殺雞焉用牛刀」，佢係故意畀年輕人去論壇磨練吓，又質疑該名男性候選人係咪歧視女性。唔知呢件事會唔會愈演愈烈呢？