中環出更：卿姐重着36年前吊帶裙
立法會議員劉慧卿（卿姐）喺卅六年前任職記者時，身穿吊帶背心裙進行採訪為人津津樂道。卿姐早前承諾會喺離開議會前穿上同一條吊帶裙現身人前，但去到最後一日開會竟然走數。佢尋日終於兌現承諾，着吊帶裙同黨友出席活動，唔少街坊見到佢「搏到盡」都嘩嘩聲，有唔少人更駐足觀看，亦有人直豎拇指讚好。
卿姐話首次着同一條裙現身係喺一九八○年，要着番卅幾年前件衫都唔係咁容易，佢仲挑戰大家，話八十年代件衫真係無邊個可以着得到，自稱好環保咁話。卿姐着起條裙顯得好興奮，仲拉起條裙尾轉咗半圈添！
被問節食 大叫黐線
咁着吊帶裙使唔使節食？佢大叫「黐線」，反問「我好肥咩？」又笑稱要同黨友着吊帶裙去蘭桂坊，接觸唔同嘅街坊。被問到咁多年點樣保存呢條裙？佢話只係放喺衣櫃內，無特別方法保存，而且呢條裙都唔係乜嘢名牌，喺夏天着起呢條吊帶裙感到特別涼爽。
卓妮