中環出更：子承父興趣 學跆拳傳「恒」心
好多人都曾經透過學習運動嚟鍛煉個人意志及毅力，尋日香港智道跆拳總會及鄂港青年交流促進會合辦兩岸四地青少年品勢錦標賽，促進會主席蔡穎恒（William）話年少時都學過跆拳道，但由於十一歲去咗加拿大，就冇繼續學喇，依家惟有由個仔延續佢童年興趣。
呢日活動聚集近六百位跆拳道學生一齊參與，中國前奧運體操選手程菲同鄭李輝都有出席同一班學生打氣。
程菲話依家學生好幸福
程菲話睇完一班學生嘅表現後，心感依家嘅學生好幸福，有好多同其他同好者交流嘅機會，進步亦會特別快。佢又話學習運動嘅人不時都會遇到樽頸位，鼓勵佢哋如果感到停滯不前，可以同導師溝通改變練習方法，又分享自己當年面對比賽壓力時會聆聽較激烈的音樂來紓壓，投入音樂嘅節拍。佢仲話自己對跆拳道都有啲興趣，遲啲或會請教參加過奧運嘅跆拳道好友過番幾招畀佢喎。
而William同智道跆拳總會主席游錦榮及青聯副秘書長何迪夫等嘉賓，喺活動開始時更一嘗以直拳擊板動作為活動揭開序幕，有氣勢又新穎。William話學習運動的確有助訓練小朋友耐力，好似以前佢哋去比賽，有時全日都冇食嘢，淨係搭車時食粒朱古力。佢笑言同囝囝練習跆拳道時，囝囝有時出拳後跌低，相當搞笑，變成一種親子樂。
卓妮