「飛象兒共我，常在那天上漫遊，要用笑做個大門口，打開天上月球。」呢首經典金曲唱出小孩子天真爛漫嘅心聲，百聽不厭，可惜吖，現實中嘅港孩為咗贏在起跑線日操夜操，連出埠旅遊都要操，搞到有氣冇碇抖，早就失去快樂童年咯。
話說有旅遊網站做過調查，發現逾九成香港家長會帶子女去旅行，但唔少人將旅行同學業掛鈎，例如係成績好嘅獎勵，或者係為咗視察海外學校環境，甚至係為咗製作求學面試檔案，逾兩成家長仲會要求子女喺飛機或旅途期間做功課添。所以話啫，香港細路仔讀書功課壓力大，連出門旅行都唔可以放鬆，都咪話唔陰功。
話時話，港孩連去旅行都冇得抖咯喎，平時更係忙到甩轆喇。有外語老師係咁講嘅，全港一至三歲幼兒約有一半曾報讀外語課程，英文同普通話已經係碎料，學習德文、西班牙文及法文先至係時尚。好似報讀法文咁吖，以前清一色係外籍兒童，近年九成係香港人，唔少家長仲會為子女同一時間報讀幾種外語，務求入學面試時一鳴驚人，真係唔到你唔服㗎。
可憐天下父母心，家長望子成龍心切，紛紛變身虎爸虎媽，其實都係為勢所逼。大家有眼見，香港社會競爭激烈，教育貴族化，孩子唔止要贏在起跑線，直頭要贏在射精前，冇十八般武藝傍身，想入名校幾乎唔使旨意，將來想有光明前途就難上加難。冇誇張㗎，有調查顯示，大學沙紙愈來愈唔馨香，無論係走出校門首份人工定係入息中位數，二十年來不升反跌。咁你話嘞，連大學生都搵食艱難，萬一子女連大學門檻都擠唔上，將來點搵食吖，家長唔閉翳就假。
之不過咁，家長願望係一回事，結果又係另一回事，揠苗助長隨時適得其反嘅咋。語言治療師指出，有三歲小朋友因為同一時間學習五國語言，結果搞到唔湯唔水，連一句完整句子都唔識講。而近年因為過度催谷而造成言語障礙嘅兒童個案更勁升兩成，部分仲搞到患上抑鬱症，要接受心理輔導添，簡直唔衰攞嚟衰。
講嚟講去，都係港府無能惹的禍。你話唔係咩，如果港府真係可以將產業做大做闊，年輕人不愁出路，香港點會有咁多怪獸家長吖？如果教育制度唔係一味着重考試，真正做到求學不是求分數，又點會有咁多學生自殺嘅悲劇吖？最近唔少港人愛上國家隊泳手傅園慧，除咗因為佢夠率真可愛，仲因為佢可以做自己，試問今時今日嘅香港，仲有幾多學生哥可以咁快樂做自己呢？