警方前排砌智障人士生豬肉，雖然最後還對方一個清白，但已搞到人哋雞毛鴨血。唔知係咪砌開有鋪癮，官老爺居然發展到砌人毒豬肉，真係唔得佢死。
冇錯嘞，功夫茶講緊嘅咪係哮喘豬流入市面呢單嘢囉。話說食環署日前驗出三百幾隻來自江西嘅活豬含哮喘藥，其中四十隻已經流入市面，署方話都冇咁快，同日公布全港二十七個零售點，而所有被封存嘅同批次豬隻及肉類都要被銷毀，都咪話唔得人驚。
即係咁，好人好姐食咗哮喘豬都可能手震、心跳加速兼頭暈，心臟病患者更分分鐘心臟衰竭，當局及早公布訊息，等市民有所防範，無可厚非，弊在港產官僚做嘢求求其其，一味貪快，結果弄巧反拙。有被指出售問題豬肉嘅商販話已經好耐冇向涉事供應商入貨，點知仍然榜上有名，署方更不由分說沒收豬肉查驗，搞到唔見一大筆；有檔主甚至聲稱出售本地豬都受池魚之殃，以致商譽受損，計劃向食環署索償咁話。
食環署又點解畫？佢哋強調有關資料由屠房營運商掌握及提供，為保障市民健康，必須迅速採取行動，至於有冇誤中副車，署方就會向零售點進一步跟進。咁即係點？即係營運商講乜官老爺信乜，連查都嫌費事，唔出事至奇。大家應該記得，之前台灣坑渠油賣通街，食安官僚初頭以為事不關己，之後急急腳公布食肆名單，結果又係錯漏百出，業界哀鴻遍野，消費者無所適從，簡直靠害。
講番哮喘豬單嘢，有立法會議員就講得啱嘞，如果唔係豬隻未有化驗結果就容許拍賣，哮喘豬就唔會如入無人之境。更得人驚嘅係，原來本港抽驗豬隻比例實行「一國兩制」，港豬五抽一，而國產豬就四十抽一，到底市民食咗幾多問題豬，真係冇人話得埋。
講開「一國兩制」，有人形容兩岸仲未統一，黑心食品早就「一國一制」，交叉感染，可謂貼切不過。大家有眼見，無論係內地蘇丹紅、孔雀石綠、過期肉，抑或台灣坑渠油、黑心茶葉，香港幾乎次次都無法幸免，幾乎次次都搞到一鑊泡，食安官僚把關不力，絕對難辭其咎。加上食安條例幾十年如一日，標準連第三世界都不如，食安危機有乜法子唔長爆長有吖。食環署三日唔埋兩日就畀申訴專員公署及審計署狂轟，年終政府部門投訴榜，更幾乎次次穩坐「一哥」寶座，家陣知點解喇。
所以話，食安官僚靠得住，哮喘豬都會上樹。市民想食啖安樂茶飯都咁難，你話係咪悲哀吖！