政情：特朗普獲提名 鄭文聰感意外
早幾日我哋喺活動上見到工業總會主席鄭文聰同中華廠商聯合會副會長吳宏斌，原來前者啱啱去完美國，後者亦已身在美國。鄭文聰話，佢剛去完美國探親戚後返港，有留意有關當地大選嘅最新情況，對於一直不被看好嘅紐約富商特朗普早前成功被提名為總統候選人，佢感到有啲意外，但認為咁樣更加證明當地人希望表達想要多一個選擇嘅意欲。
鄭文聰估計，當地人到投票時未必真係會選特朗普，但就可能想藉此表達需要更多不同選擇嘅訴求。如果特朗普當選，對佢哋生意都會有影響。不過，佢樂觀認為有危自有機，好似英國脫歐咁，總有人可以喺呢啲機會之中賺到錢嘅。
吳宏斌頻頻飛美國見客
至於吳宏斌喺美國亦有生意，佢話現時美國係佢哋主要交易對象，加上經濟唔多好，所以更加要頻密地飛去見客，同客戶保持聯繫同溝通，但既然去開嗰邊，梗係順便當旅行幾日啦！