政情：廉署3R「同車去」各自返
一度立立亂嘅廉政公署暫時回復平靜，執行處三位Ricky，即署理首長丘樹春、兩位處長余振昌及朱敏健首度公開出現，即使尋日周末亦有返廉署總部，之後三人外出兩小時，未知係咪商討未來大計，今次亦係丘樹春遞信又決定留任後首度現身。
每逢周末嘅北角廉署總部都比較淡靜，但尋日就相當熱鬧，事關執行處三巨頭朝早九點半陸續揸車返廉署，最先係余振昌，之後係朱敏健，未幾輪到丘樹春揸車到場。約十分鐘後，三人一同乘坐曾係李寶蘭座駕嘅專用車輛齊齊離開廉署，莫非係同猛人密會？抑或係商討未來大計呢？
兩個鐘頭後，朱敏健首先坐私家車回來，之後到余振昌，但余冇坐車，而係行返廉署。兩個見到記者都友善咁微笑，朱敏健就話出去係處理一啲公務。
廉署上月因為廉政專員白韞六取消李寶蘭署任執行處首長，鬧得滿城風雨，接替李寶蘭嘅丘樹春更一度遞信，逼到白韞六要急急搵番過咗監警會六年嘅朱敏健回巢救亡，最終丘樹春喺同事強烈挽留下留任。