政情：議助工會 敵我分明
唔少行業職工都依靠工會代為出頭，好似救生員同空中服務員工會就經常發起工業行動，為業界爭取權益。不過，經常爭取與公務員薪酬掛鈎嘅議員助理（議助），可能因為無工會支持，事件始終未能引起關注。早前一批泛民主派議員助理及民間團體嘅職員，就計劃籌組工會，希望為議助爭取應有福利，但一問之下，原來一直有幾個議助工會運作緊，泛民議助另起爐灶嘅原因其實同社會撕裂有關。
本身係民主動力秘書處職員嘅林正軒，七月開始同三十多人一齊籌組「社會及政治組織從業員工會籌委會」，上星期正式向勞工處職工會登記局登記成為工會。佢覺得，公眾一直唔了解議助嘅工作，希望成立工會引起公眾關注，又話曾邀請建制派議助加入，但佢哋似乎無興趣。佢話工聯會轄下都有議員工作人員協會、地區及社會專業人員協會，但「荒廢」已久，所以未能吸引現有議助加入，佢承認喺現時社會氣氛下，泛民與建制議助都難以合作。
昔無分左右 今社會撕裂
其實喺九四至九五年間，議助曾經組織立法局議員助理協會，主要目的係同立法局秘書處就薪酬問題及政策研究作出討論。曾經做過議員助理協會會長嘅蔡耀昌話，可能以前議助之間未有敵我分明，成立工會都會較為容易，以目前情況就會比較困難喇。佢話當時政治環境唔似依家咁撕裂，協會內同時有來自港同盟（民主黨前身）、自由黨及民建聯嘅成員，而且大家都合作順利。
後來九七年回歸，唔少議員都因為無「直通車」而暫別議會，有人一去不返，連帶協會嘅中堅分子都唔再係議助，所以協會從此消失。蔡耀昌話，之後工聯會都有成立議員工作人員協會、地區及社會專業人員協會，但因為政治氣氛差，所以未能成功拉攏泛民及建制議助加入，對於協助議助爭取權益一事，亦出現斷層。無論如何，佢話有年輕人為議助成立工會係好事，至於有冇方法集合泛民同建制議助嘅力量呢？佢就話要交畀班後生去思考喎！