下屆立法會十月先至上任，但立法會主席寶座以至各委員會正副主席人選，已開始玩競猜遊戲。卓妮早前已講過立法會主席寶座好大機會由現屆立法會內務委員會主席梁君彥（Andrew）及順利連任嘅商界（第二）議員廖長江爭奪，但有指由於Andrew早前主持內委會及擔任大會代主席時作風強硬，令泛民主派吹起「ABA」風，即Anyone But Andrew（除了Andrew，任何人都可以），令本身係大律師嘅廖長江被睇高一線。
至於其他委員會又點呢？其中內委會、財務委員會及政府帳目委員會嘅主席之位，相信亦會有一番激烈競爭。不過，聞說現任帳委會主席石禮謙無意喺新一屆立法會再加入帳委會，雖然有人對帳委會主席之位虎視眈眈，但並非政府信得過嘅人選，而另一委員吳亮星又已放棄連任議員，所以泛民就更加係難以奪得主席之位。故此，帳委會主席一職最終花落誰家，都係要留待下屆立法會上任後先有分曉喇！
卓妮