中環出更：立會唔使爭櫈仔 波哥即Book機位
立法會會期已於七月中完結，大家可以暫別議會嘅「催魂鐘」。卓妮日前喺一個同IT界有關嘅活動上，見到兩位自動當選連任功能界別議員，就係保險界議員陳健波（波哥）同進出口界議員黃定光（象哥），由於兩人毋須應付選戰，所以已經安排好節目及工作，認真識善用時間。
波哥後日就會獨自啟程到瑞士十日，與一個長居德國嘅朋友行山。佢仲話，今次旅程安排得好趕，因為一直擔心選舉會有競爭對手而遲遲未確定成行，直至選舉提名期完結當日，一知道冇競爭對手就立即預訂機票同酒店。不過，波哥因為太趕急，十日行程都要分開兩間酒店住，但兩間酒店都位於湖邊，相信風景一樣咁正嘅！
象哥月底入廠切息肉
講起旅行，波哥就好興奮，仲話過去一年擔任財務委員會主席時受得太多冤屈氣，所以要去接觸吓大自然，為自己充足電，順便當係一個路向營，檢討過去一年嘅表現同尋找方向。咁佢下屆仲會唔會續任財委會主席呢？波哥就耍手擰頭話留畀其他未做過嘅人喎。
至於象哥就冇咁歎喇，佢話仍然忙於跟進新田邊境購物城計劃，遲吓仲要送自己「入廠」維修。到底發生咩事呢？象哥透露，農曆新年前小病一場後聲音就一直沙啞，講嘢時更比以往提氣同用力，所以喺兩個月前進行檢查。發現聲帶有良性息肉，於是安排月底做微創手術切除。象哥話手術喺私家醫院進行，形容今次只係小手術，因為即日就可以出院。不過，最弊就係手術後有四日唔出得聲，所以要趁手術前講晒未來四日嘅說話喇。
同場仲有中華廠商聯合會永遠名譽會長施榮懷（Irons），佢話今年無打算去巴西睇奧運，因為○八年於現場觀賞後，發現睇電視更清楚，而且能夠同時睇唔同項目添。Irons嚟緊仲會同家人去越南峴港旅行，享受陽光與海灘，實行輕鬆吓。
卓妮